Nëna e Alexei Navalny ka thënë se ka parë trupin e djalit të saj dhe se zyrtarët po përpiqen ta detyrojnë atë të mbajë një ceremoni private varrimi.
Lyudmila Navalnaya, duke folur në një video të publikuar në YouTube, tha se zyrtarët i kishin thënë asaj se “koha nuk po punon për ty”, duke nënkuptuar se trupi i djalit të saj po “dekompozohej”.
Ajo tha se zyrtarët kishin kërcënuar se do të “bënin diçka” me trupin nëse ajo nuk pranonte një funeral të fshehtë.
“Po e incizoj këtë video sepse filluan të më kërcënojnë”, tha ajo.
“Duke më parë në sy, më thonë se nëse nuk jam dakord për një varrim të fshehtë, do të bëjnë diçka me trupin e djalit tim”.
Ajo citoi gjithashtu një hetues që i kishte thënë:
“Koha nuk po punon për ty, kufomat po dekompozohen”.
Nuk pati asnjë përgjigje të menjëhershme nga hetuesit rusë.
Navalny, një kritik i zëshëm i Presidentit Vladimir Putin dhe një fytyrë kryesore në opozitën ruse ndaj lidershipit të tij vdiq në një burg të Arktikut.
Zonja Navalnaya u ka bërë thirrje autoriteteve që t’ia japin trupin e tij familjes. Kjo erdhi pasi ekipi i Navalny tha se certifikata e tij e vdekjes tregonte se ai kishte vdekur nga shkaqe natyrore.
E veja e Navalny, Yulia Navalnaya, të hënën akuzoi Vladimir Putinin si përgjegjës për vdekjen e burrit të saj dhe pretendoi se ai kishte vdekur si pasojë e agjentit nervor, Novichok.
Ajo gjithashtu akuzoi autoritetet për fshehjen e trupit të tij në mënyrë që gjurmët e helmit të zhdukeshin.
Zëdhënësi i Kremlinit Dmitriy Peskov tha se presidenti rus nuk e shikoi videon dhe nuk do të komentonte duke qenë se zonja Navalnaya ka mbetur e ve së fundmi, por ai i mohoi akuzat për Novichok./Opinion.al
