Zv/kryetari i Grupit Parlamentar CDU/CSU në Bundestagun gjerman, Johann David Wadephul ka përshëndetur vendimin e Këshillit të Ministrave të Bashkimit Europian për celjen e negociatave me Shqipërinë por ai i ka dhënë gjithashtu një ‘shuplakë’ Komisionit Europian ‘Junker’.
Në reagimin e tij ai thekson se fakti që vendet anëtare kanë vendosur sot 15 kushte për Shqipërinë tregon se propozimi i Komisionit që ato të hapeshin pa kushte ishte i pa studiuar. Ai thotë se pret nga Komisioni i ri që të monitorojë sic duhet përmbushjen e kushteve.
Wadephul shton gjithashtu se vendimi i sotëm konfirmon perspektivën europiane të Shqipërisë dhe Maqedonisë së Veriut .
“Vendimi i sotëm i Këshillit të Ministrave të Bashkimit Europian konfirmon perspektivën europiane të Maqedonisë së Veriut dhe Shqipërisë. Ky është një sinjal inkurajimi dhe shprese për qytetarët, sidomos në këto kohë të vështira të krizës së koronavirusit, e cila i ka prekur të dyja këto vende në shkallë të konsiderueshme.
Në të njëjtën kohë, vendimi i Këshillit të Ministrave është një deklaratë mosbesimi ndaj Komisionit Europian. Ky i fundit kishte propozuar që negociatat me Shqipërinë të nisin pa kushte. Fakti që vendet anëtare sot kanë vendosur 15 kushte dëshmon se ato presin që Komisioni Europian të monitorojë progresin në mënyrë më strikte dhe me më shumë kujdes. Kjo vlen për përmbushjen e 15 parakushteve, si edhe për të gjithë procesin e negociatave.
Ne jemi të bindur se Komisioni i ri Europian nën drejtimin e Presidentes Ursula von der Leyen do ta marrë këtë parasysh. Grupi parlamentar CDU/CSU bashkë me gjithë partnerët e tij Europianë, do të jetë i palëkundur derisa 15 parakushtet të përmbushen plotësisht përpara se të nisin negociatat e pranimit me Shqipërinë.”, deklaron nënkryetari i grupit parlamentar të CDU/CSU-së. /Opinion.al
