Presidenti Ilir Meta, të hënën, i ka dhënë plotfuqinë për grupin negociator Ministrisë së Jashtme për negocimin e projektmarrëveshjes ndërmjet Shqipërisë dhe Greqisë për kufizimin e zonave detare.
Përmes një njoftimi për mediat, Presidenca bën me dije se në vijim të kërkesës të Ministrisë për Evropën dhe Punët e Jashtme autorizoi sot ministrin Ditmir Bushati, të lëshojë Plotfuqinë për Grupin Negociator të Republikës së Shqipërisë për negocimin e projektmarrëveshjes ndërmjet Republikës së Shqipërisë dhe Republikës së Greqisë për kufizimin e zonave të tyre detare.
“Meta u kërkon Ministrisë për Evropën dhe Punët e Jashtme, institucioneve shtetërore shqiptare, të përfshira në këto negociata dhe Grupit Negociator, të përmbushin përgjegjësitë e tyre në respekt të Kushtetutës së Republikës së Shqipërisë, të Vendimit nr.15, datë 15.04.2010 të Gjykatës Kushtetuese, akteve ndërkombëtare ku Republika e Shqipërisë është palë, kuadrit të brendshëm ligjor, në interes të ruajtjes dhe ushtrimit të sovranitetit territorial dhe juridiksionit kombëtar dhe të garantimit të sigurisë, dobisë ekonomike e sociale të vendit”, – sqaron Presidenca.
