Komisionerja e Bashkimit Evropian për Zgjerimin, Marta Kos, zhvillon nesër një video-konferencë me kryeministrin Edi Rama dhe me ministren e Shtetit dhe kryenegociatoren Majlinda Dhuka.
Në fokus të bisedës, pritet të jenë hapat konkretë për hapjen së shpejti edhe të dy grupkapitujve të fundit të negociatave me BE.
Nesër, 11 qershor, ambasadorët e 27 shteteve anëtare të BE- së pritet që të miratojnë raportin mbi ecurinë e përgatitjeve teknike për grup-kapitullin 4 që ka të bëjë me agjendën e gjelbër dhe lidhshmërinë e qëndrueshme.
Kujtojmë se vizitën e saj zyrtare në Shqipëri, Kos e zhvilloi më 13 mars 2025, ditë kur mbajti edhe një konferencë të përbashkët me kreun e qeverisë shqiptare.
Ajo ka shprehur vazhdimisht mbështetjen e saj për rrugëtimin e Shqipërisë deri në anëtarësimin e plotë në familjen europiane. Edhe gjatë raportimeve të saj të fundit në Parlamentin Europian, Kos solli si shembull vendin tonë për shpejtësinë në realizimin e reformave.
“Ne kemi mundësi reale që brenda vitit 2029 të vlerësojmë një ose më shumë shtete kandidate si anëtare me të drejta të plota në BE. Me Shqipërinë kemi hapur tashmë 24 kapituj të negociatave. Vetëm në dy muajt e fundit hapëm kapitullin e dytë, edhe atë të tretë. Kështu, kandidatët e kanë kuptuar momentin e ri të zgjerimit duke bërë reforma më të shpejta së më parë”, u shpreh Komisionerja.
Kos tha se Shqipëria, së bashku me Malin e Zi, janë shtetet kandidate më të përparuara, veçanërisht në sundimin e ligjit.
