Ministri i Jashtëm i Greqisë, Nikos Kotzias, reagoi pas përfundimit të samitit të Ministrave të Jashtëm të BE, për çështjen e hapjes së negociatave me Shqipërinë.
Prej kohësh mediat kanë spekuluar se Greqia do japë dritën jeshile për Shqipërinë, pavarësisht fërkimeve të fundit.
Kotzias nuk ishte i drejtpërdrejtë kur u pyet për këtë çështje.
I pyetur se cili është qëndrimi i Greqisë në një kohë kur Holanda kërkon që negociatat e pranimit të nisin pas përfundimit të zgjedhjeve, Kotzias tha: “Pozicioni ynë është që Shqipëria të plotësojë të pesta kushtet- jo vetëm atë që lidhet me reformën në drejtësi, që procedurat e integrimit të jenë thelbësore”.
I pyetur nëse ka një datë për nisjen e negociatave me Shqipërinë, ai tha se në raport nuk specifikohet diçka e tillë.
Ministri grek i është përgjigjur edhe akuzave të ish-ministres së Jashtme, Dora Bakojanis, e cila e cilëson mungesën e një kritike sado të vogël për Shqipërinë në raport, në lidhje me “çështjen çame” apo mbrojtjen e të drejtave të minoritetit grek në Shqipëri, si një humbje për diplomacinë greke.
Kotzias tha se opozita konservatore duhet të shohë se qeveria “Tsipras”, prej fillimeve të saj në vitin 2015 ka dërguar raporte të plota dhe konkrete në BE, për sa i përket të drejtave të minoritetit grek në Shqipëri.
