Kryeparlamentarja, Lindita Nikolla, ka thirrur ditën e nesërme mbledhjen e Konferencës së Kryetarëve që pritet të mbahet në orën 13:30.
Me shumë gjasa, kjo mbledhje do të mbahet për diskutimin e dakordësie për negociatat PS-PD.
Sipas TvKlan mësohet se pas negociatave intensive të 2 javëve të fundit mes kryetarit të grupit parlamentar socialist Bledi Çuçit dhe homologut të tij demokrat Gazment Bardhit, pritet që opozita të heqë dorë nga strategjia bllokuese që në seancën e 21 Marsit.
Kompromisi, që me shumë gjasë, sipas burimeve të konfirmuara, do të finalizohet gjatë kësaj jave pasi socialistët kanë pranuar një nga dy kërkesat e panegociueshme të demokratëve, atë për Komisionet Hetimore, ndonëse pjesërisht.
Shumica ka pranuar 2 prej 8 kërkesave të opozitës për ngritjen e Komisioneve Hetimore, por nuk bëhet e ditur se cilat prej tyre. Gjuha e kompromisit nuk është gjendur ende për kërkesën tjetër, atë të propozimeve të demokratëve për ndryshimin e përbërjes së Komisionit të Reformës Zgjedhore, përfshirë dhe bashkëkryetarin.
Zhvillimet e fundit vijnë pas zyrtarizimit të bashkimit të grupimit të Berishës dhe të Bardhit.
