Tragjedia e Zelandës së Re, ku humbën jetën 50 persona, mund të sjellë një krizë diplomatike mes Australisë dhe Turqisë. Kryeministri australian Scott Morrison i ka quajtur fjalët e presidentit turk Erdogan si “të pamatura, të padenja dhe ofensive”. Erdogan, lidhur me tragjedinë e Zelandës së Re, tha se “kjo bën pjesë në sulmin ndaj Islamit dhe Turqisë”.
Gjatë një takimi elektoral, Erdogani u tregoi të pranishmëve videon e tragjedisë që kishte xhiruar vrasësi, duke thënë se anti-myslimanët do të duhet të futen në arkivole si baballarët e tyre. Ai i referohej betejës së Galipolit, simbol i rezistencës otomane ndaj imperializmit europian në Luftën e Parë Boterore.
“Në një mënyrë apo në një tjetër, do ta bëjmë të paguajë. Nëse nuk e dënon Zelanda e Re, do ta bëjmë ne”, ka thënë Erdogan për terroristin australian Brenton Tarrant. Menjëherë pas kësaj, Scott Morrison ka thirrur ambasadorin turk në Australi duke i kërkuar shpjegime për deklaratat e Erdoganit. “Ishte një koment tronditës dhe shumë ofensiv”, ka thënë Morrison./Opinion.al
