Në qytetin e vogël slloven Sevnica ka lindur dhe është rritur zonja e parë e ardhshme e Shteteve të Bashkuara të Amerikës, gruaja e Donald Trump dhe nëna e djalit të tij Barron-it
Në qytetin e vogël slloven Sevnica ka lindur dhe është rritur zonja e parë e ardhshme e Shteteve të Bashkuara të Amerikës (SHBA), gruaja e Donald Trump dhe nëna e djalit të tij Barron-it, Melania Trump.
Edhe pse nuk vjen shpesh në vendlindjen e saj, disa bashkëvendas të Melanias rikujtojnë kujtimet, e disa ende mbajnë kontakte me ta. Ata janë krenar se gruaja më e fuqishme në botë është nga vendi i tyre dhe njëra prej tyre.
Qyteza Sevnica ndodhet në bregun e majtë të lumit Sava në rrjedhën e sipërme nga Kërshko ndërsa pas fitores të Donald Trump-it në zgjedhjet presidenciale në SHBA, ka tërhequr vëmendjen e opinionit botëror.
Në këtë qytet me afër 5 mijë banorë në ditët e fundit vijnë ekipe të medias nga vende të ndryshme evropiane, dhe një pjesë e gazetarëve bashkë me qytetarë ndoqën rezultatet në natën e zgjedhjeve në një kafene në qendër të qytezës. Fjala është për vendin ku ka lindur Melania Trump, me mbiemrin e saj të lindjes Knavs në vitin 1970.
Melania Knavs në këtë qytet u rrit dhe kreu shkollën fillore për të ndjekur mësimet e shkollës së mesme në Lubjanë, ku dhe filloi të studiojë për dizajn, e cila më pas e çoi në Itali, pastaj edhe në Amerikë, në botën e modës dhe modelimit.
