Një megaoperacion mes tre shtetesh i koduar “ICARO.AL” ka goditur një grup shqiptar të trafikut të kokainës nga Amerika e Jugut në Europë.
Grupi trafikonte kokainën kryesisht në Itali dhe në shtete të tjera të Europës Qëndrore.
Operacioni u zhvillua nga Italia, Shqipëria dhe në Spanjë. Deri tani janë vënë në pranga 12 persona dhe po hetohen 8 të tjerë.
Në Shqipëri, policia ka vënë në pranga me qëllim ekstradimin, 5 pjesëtarë të Grupit të identifikuar si; Igli Dervishi, Shkëlqim Pashja, Ervin Dema, Edmond Zhuja dhe Genti Berisha.
Më tej, si rezultat i sigurimit të informacionit nga strukturat e Policisë shqiptare, dhe shkëmbimit të tij me homologët spanjollë, u vu në pranga në Spanjë shtetasi shqiptar me precedent penal, Gerardo Pashja alias Astrit Pashja.
Gjithashtu, gjatë zhvillimit të këtij megaoperacioni, në Shqipëri, është identifikuar dhe shpallur në kërkim shtetasi M. M., 28 vjeç, i cili kërkohet dhe për vepra të tjera penale.
“Këta shtetas akuzohen nga Gjykata e Breshias, Itali, se të organizuar si grup, kanë trafikuar lëndë narkotike Kokainë nga Amerika e Jugut, nëpërmjet automjeteve të modifikuara për fshehjen e lëndës narkotike dhe e kanë shitur atë në qytete të Italisë dhe në shtete të Europës Qendrore”, njofton policia.
