Ka mbërritur në Rinas, Presidentja e Komisionit Europian, Ursula von der Leyen. Ajo është pritur nga ministrja e Shtetit për Marrëdhëniet me Parlamentin, Elisa Spiropali. Lajmi është bërë i ditur nga vetë ministrja Spiropali, e cila, ka publikuar fotot në rrjetet sociale.
“Kënaqësi e veçantë të prisja sot në Tiranë, në kuadër të Samitit të Procesit të Berlinit, Presidenten e Komisionit Europian, Ursula von der Leyen.
Ky samit është një tjetër event i rëndësishëm ndërkombëtar për Shqipërinë, i cili zhvillohet për herë të parë jashtë kufijve të BE-së, me pjesëmarrjen e 6 kryeministrave të rajonit, liderëve të vendeve anëtare të BE-së si dhe përfaqësuesve të nivelit të lartë dhe organizmave ndërkombëtare të mbi 25 vendeve”-tha Spiropali.
Pas mbërritjes në kryeqytetin shqiptar, Von der Leyen do të zhvillojë takim me Presidentin Bajram Begaj, rreth orës 15:30 në Presidencë.
Më tej, Von der Leyen do të takohet me kryeministrin Edi Rama, me të cilin pritet të zhvillojnë një konferencë për shtyp rreth orës 17:30.
Von der Leyen po vjen në Shqipëri, në kuadër të Samitit të Procesit të Berlinit.
