Ky është Lutfi Shabani, i njohur ndryshe si “Ben Çami” dhe kjo është hera e tretë që del para Gjykatës së Krimeve të Rënda. Akuza është e njëjtë, ajo e trafikut të lëndëve narkotike.
45 – vjeçari u arrestua të shtunën nga policia, pasi dyshohet se është një nga personat kyç në trafikun e 574 kilogramë kanabis drejt Turqisë. Droga u kap në Kapshticë dhe fillimisht u vu në pranga, Eldi Zahiri shofer i kamionit.
Nga deponimet e tij, por edhe veprimet e tjera hetimore të kryera nga Prokuroria për Krimet e Rënda dhe policia, u zbulua se pjesë e trafikut ishin “Ben Çami” dhe Janaq Koçeli.
Gjykatësi Bib Ndreca e ka cilësuar të ligjshmë ndalimin e këtyre tre personave dhe ka caktuar si masë sigurie arrestin me burg.
Lutfi Shabani nuk është një emër i panjohur për drejtësinë shqiptare.
Në vitin 2007 ai është dënuar me 2 vite burg si pjesë e një rrjeti të trafikut të heroinës drejt Italisë, pasi u kap me 100 kilogramë përzierës droge të një cilësie të lartë.
Pasi kreu këtë dënim, ai rikthehet përsëri trafikut dhe arrestohet në flagrancë me 15 kilogramë heroinë dhe në Shtator të 2009 ai u dënua me 8 vite heqje lirie. /Tv Klan
