Alwaleed bin Khaled bin Talal Al Saud, princi saudit, i njohur ndërkombëtarisht si “Princi i fjetur”, është ndarë nga jeta në moshën 36-vjeçare, pas afro njëzet vitesh në koma.
Babai i tij, princi Khalid bin Talal Al Saud, nipi i miliarderit Al-Walid bin Talal, bëri të ditur lajmin të Shtunën më 19 korrik.
“Shpirti im, kthehu te Zoti yt i kënaqur dhe i pranuar prej Tij. Hyr mes shërbëtorëve të drejtë të Mi dhe hyr në Xhenetin Tim… Me besim të thellë në vullnetin e Allahut dhe me pikëllim të madh, vajtojmë djalin tonë të dashur”, shkroi princi Khalid në platformën X, duke shoqëruar njoftimin me një foto bardhezi të të birit të shtrirë në shtratin e spitalit.
Ceremonia mortore u planifikua për sot, më 20 korrik, ndërsa familja u përgatit për të dhënë lamtumirën përfundimtare një djali që jetoi për vite të tëra në kufirin mes jetës dhe vdekjes.
Ndrryshe i njohur nga familjarët me nofkën “Ndede”, Al-Ualid lindi në prill të vitit 1990. Ndërkohë në vitin 2005, kur ishte 15 vjeç dhe studionte në një akademi ushtarake në Londër, pësoi një aksident të rëndë automobilistik që i shkaktoi trauma të rënda në kokë dhe gjakderdhje të brendshme, duke e futur në një gjendje kome të thellë nga e cila nuk u zgjua më kurrë.
