Julian Meçaj, ish-anëtar i bandës së Durrësit, është arrestuar nga policia në Dubai.
Julian Meçaj ishte shpallur në kërkim për atentatin ndaj prokurorit Arjan Ndoji në vitin 2019, ku mbeti i vrarë shoferi i tij Andi Maloku.
Julian Meçaj u shpall në kërkim nga SPAK rreth një vit më parë, pasi Prokuroria e Posaçme, pas zbardhjes së dëshmive kyçe të Nuredin Dumanit, zbuloi një grup të strukturuar kriminal të drejtuar nga Plarent Dervishaj, përfshirë në atentatin e prokurorit Arjan Ndoj 5 vite më parë, shkruan Report.Tv.
Në pranga ranë 5 bashkëpunëtor, mes të cilëve edhe një agjent doganor, dhe në kërkim u shpall koka që organizoi gjithçka, Plarent Dervishi që drejtonte bandën me miq e familjarë.
Në janar të vitit 2023, me urdhër të SPAK u arrestuar Genti Ndërjaku alias Kili Ndërjaku (40 vjeç) që i shpëtoi një atentati me snajper më 12 shtator 2022 në Durrës, Marsel Deçka (38 vjeç), Endrit Sinani (29 vjeç), Julian Pjetri (45 vjeç) dhe Bashkim Haxhija (54 vjeç).
Në kërkim u shpall Plarent Dervishaj, i cili dyshohet po ashtu se ndodhet në Duabi si dhe Ramazan Rraja, i arrestuar tashmë nga policia.
