Policia rrugore ka bërë një bilanc për drejtuesit e mjeteve të cilët kanë kryer shkelje të qarkullimit rrugor si dhe korrupsion ndaj efektivëve.
Sipas një njoftimi zyrtar, uniformat blu bëjnë me dije se kanë arrestuar një 42-vjeçar duke drejtuar automjetin në gjendje të dehur dhe i cili ka tentuar të korruptojë punonjësit e Policisë, duke i ofruar atyre shuma parash.
Policia njofton se numri i të arrestuarve lidhur me këtë vepër penale ka shkuar në 70.
“Gjatë kontrolleve parandaluese për rritjen e parametrave të sigurisë rrugore, shërbimet e Komisariatit të Policisë Rrugore kanë konstatuar 42-vjeçarin me iniciale M. G., duke drejtuar automjetin në gjendje të dehur.
42-vjeçari me qëllim shmangien e përgjegjësisë ligjore, ka tentuar të korruptojë punonjësit e Policisë, duke i ofruar atyre shuma parash.
Policia thotë se lufta kundër këtij fenomeni të turpshëm do të intensifikohet, qoftë ndaj shkelësve, qoftë ndaj atyre që kryejnë korrupsionin pasiv, punonjësve të Policisë.
