Një ndeshje futbolli në kampionatin turk degjeneroi në kaos, pasi tifozët dhe lojtarët u përleshën para, gjatë dhe pas ndeshjes. Në rrjetet sociale u shpërndanë foto dhe video që treguan skenat dramatike, që ndryshonin në mënyrë drastike nga ato të disa ditëve më parë, kur tifozët hidhnin pelushë në fushë, në homazh për viktimat e tërmetit të 6 shkurtit. Këtë herë, në fushë u hodhën objekte të rënda, shishe uji, fishekzjarrë dhe madje edhe një thikë.
Tifozët dhe lojtarët e skuadrës vendase, Bursaspor, u akuzuan se sulmuan lojtarët e skuadrës mike, Amedspor. Në llogarinë e klubit Amedspor në Instagram u publikua një video e sulmit të lojtarëve të Bursaspor në fushën e lojës, teksa kryenin nxemjen.
Por pavarësisht incidentit, ndeshja u lejua të zhvillohej. Sjellja e dhunshme vijoi edhe gjatë ndeshjes, ku tifozët hodhën fishekzjarrë, madje në një foto të publikuar në rrjetet sociale u shfaq edhe një thikë. Edhe pas fundit të takimit, sherri raportohet se vijoi.
Përfaqësuesit e Amedspor pretendojnë se u sulmuan edhe nga shefi i rojeve të sigurisë, zyrtarë të sigurisë së klubit dhe madje edhe efektivët e policisë.
Në vitet e fundit, Amedspor është vënë në qendër të kritikave pasi drejtuesit e klubit vendosën të ndryshonin emrin, duke reflektuar emrin kurd të qytetit, nga Diyarbakir në Amed. Gjatë ndeshjeve, tifozët kundërshtarë këndojnë rregullisht këngë antikurde dhe takimet shpesh përfundojnë dhunshëm.
Pas takimit, edhe Bursaspor postoi një video në rrjetet sociale ku pretendonte se shfaqeshin lojtarët e saj që dhunoheshin gjatë takimit të mëparshëm të zhvilluar në Diyarbakir.
Sa i përket rezultatit, Bursaspor fitoi 2-1, duke u ngjitur në vend të 15-të të renditjes së Kategorisë së Tretë. Ndërsa Amedsport mbeti në vend të tretë.
