Ka hyrë në fuqi që nga mëngjesi i sotëm ndalimi i hyrjes në Shtetet e Bashkuara për shtetasit e 12 vendeve, pas një dekreti të nënshkruar javën e kaluar nga presidenti i SHBA, Donald Trump.
Sipas dekretit të Trump, ky vendim u mor për të mbrojtur SHBA nga terroristët e huaj dhe kërcënimet e tjera ndaj sigurisë kombëtare dhe prek qytetarët e Afganistanit, Mianmarit, Çadit, Kongo-Brazavilit, Guinea Ekuatoriale, Eritreas, Haitit, Iranit, Libisë, Somalisë, Sudanit dhe Jemenit.
Qeveria amerikane, që ndjek një politikë mjaft të rreptë migracioni, sqaroi se këto vende u përfshinë në listë sepse nuk kanë mekanizma efektivë për të kontrolluar siç duhet udhëtarët dhe sepse qytetarët e tyre kanë prirje të qëndrojnë në SHBA edhe pasi u skadon viza.
I njëjti dekret vendosi kufizime në dhënien e vizave për shtetasit e shtatë vendeve të tjera: Burundi, Kuba, Laosi, Sierra Leone, Togo, Turkmenistani dhe Venezuela.
Trump e krahasoi këtë vendim të shpallur të mërkurën me “kufizimet efektive” që kishte vendosur ndaj qytetarëve të shtatë vendeve me shumicë myslimane në fillim të mandatit të tij të parë presidencial, më 2017, vendim i njohur nga kritikët si “ndalimi për myslimanët” (Muslim Ban). Katër vende janë përfshirë në të dyja listat, atë të 2017 dhe këtë të re: Irani, Libia, Sudani dhe Jemeni.
Presidenti republikan përmendi një sulm të ndodhur më 1 qershor në Kolorado, ku një egjiptian me vizë të skaduar sulmoi një marshim hebre me pasojë 12 të plagosur, si shembull të “rreziqeve ekstreme nga hyrja e të huajve që nuk janë kontrolluar siç duhet”. Egjipti, vendi i origjinës së autorit të sulmit, nuk është përfshirë në listën e shpallur nga Trump.
“Nuk do të lejojmë që ajo që ka ndodhur në Europë të ndodhë në Amerikë,” tha presidenti amerikan duke iu referuar sulmeve të kryera nga qytetarë të huaj në kontinentin evropian. Shumë nga vendet e përfshira në listë kanë shprehur shqetësim dhe konfuzion për këtë ndalim.
Një nga vendet e përfshira, Çadi, reagoi duke pezulluar lëshimin e vizave për qytetarët amerikanë, si kundërpërgjigje.
Megjithatë, dekreti i Trump parashikon disa përjashtime për poseduesit e disa llojeve të vizave, për diplomatët dhe për persona udhëtimi i të cilëve në SHBA “përmbush interesin kombëtar”. Ndalimi i janarit 2017 kishte shkaktuar protesta në shumë aeroporte të mëdha amerikane.
