Kriza politike nuk ka penguar socialistët të bëhen gati, siç tha dhe kryeministri Edi Rama, për të ndezur motorët e fushatës elektorale për zgjedhjet e qershorit. Përgatitjet për kongresin e së shtunës kanë nisur ndërsa do të zhvillohet i ndarë në tre sesione dhe në tre ambiente të ndryshme.
Në Pallatin e Kongrese do të bëhet çelja e Kongresit nga sekretari i përgjithshëm, Taulant Balla dhe do të zhvillohet sesioni i Bashkëqeverisjes me njerëzit ku do të flasin disa nga ministrat dhe zëvendëskryeministri, ministri i Jashtëm në detyrë dhe ministrja për Marrëdhëniet me Parlamentin do të kenë fjalime për ecurinë e reformave për çeljen e negociatave.
Sesioni i dytë që do të fokusohet tek “Bashkia që Duam” do të nisë në Pallatin e Kongreseve dhe do të përfundojë në sheshin Nënë Tereza ku do të çelet fushata për zgjedhjet për kryeqytetin ku do të konfirmohet Erion Veliaj dhe do të bëhet publike lista me 100 kandidatët për Këshillat Bashkiak.
Edhe pse nuk kanë vendosur ende për kandidatët që do të garojnë në 61 bashki, emrat e disa prej tyre janë bërë publik tashmë dhe 6 prej tyre do t’i drejtohen me fjalë dhe delegatëve në Pallatin Kongreseve.
Veç Armand Subashit në Fier, Sotiraq Filos në Korçë, Dritan Lelit në Vlorë e Majlinda Bufit në Roskovec që rikonfirmohen si kandidatura në Kongres do të flasin dhe deputeti Pjerin Ndreu që pritet të jetë kandidati i socialistëve për bashkinë e Lezhës dhe prefekti i Elbasanit Gledian Llatja që do të propozohet nga selia rozë si kandidaturë për të zënë vendin e Qazim Sejdit me 3 mandate si kryebashkiak.
Nga opozita deri tani nuk ka asnjë sinjal për zgjedhjet lokale, ndërsa Partia Demokratik këtë të premte ka denoncuar përdorimin e administratës në aktivitetet e PS.
Veç këtij mesazh, janë publikuar edhe video ku nëpër Tiranë janë ngjitur postera për takimin e së shtunës.
https://www.facebook.com/akilkraja/videos/2215924425402142/
Sipas PD, këto postera shkelin Kodin elektoral në dy aspekte:
Neni 77-Fushata zgjedhore fillon 30 ditë para datës së zgjedhjeve dhe përfundon 24 orë para datës së zgjedhjeve.
Neni 79
1. Kryetari i njësisë së qeverisjes vendore cakton, në mënyrë të drejtë dhe të paanshme, vendet publike për afishimin e materialeve propagandistike.
2. KQZ-ja miraton, me udhëzim të veçantë, kriteret për përzgjedhjen e këtyre vendeve.
3. Çdo afishim i materialeve propagandistike jashtë vendeve publike të autorizuara sjell heqjen e tyre nga organet e zbatimit të ligjit, në varësi të njësisë qeverisjes vendore./Opinion.al
