Kryeministri Edi Rama ka ndryshuar ditën e sotme Qeverinë në Kongresin e PS-së, ku vendosi t’i besojë tre drejtorëve “të panjohur” tre ministritë më të rëndësishme në vend.
Rama në vend të Taulant Ballës ka emëruar Ervin Hoxhën si Ministër të Brendshëm, i cili mbante aktualisht postin e kreut të IKMT-së.
Petrit Malaj është emëruar Ministër i Financave në vend të Ervin Metes dhe Pirro Vëngu Ministër i Mbrojtjes, post i mbajtur deri më sot nga Niko Peleshi.
Malaj, me profesion ekonomist, mbante postin e kreut të Agjencisë Kombëtare të Burimeve Natyrore.
Ai është diplomuar në Fakultetin Ekonomik të Universitetit të Tiranës, ka vijuar studimet për Master në “Business Administration” në Universitetin Wisconsin La Crosse në SHBA.
Malaj është kualifikuar për “Banking and Finance” në Universitetin Georgetown, SHBA dhe më pas ka ndjekur një program kualifikimi për Drejtimin e Tregut të Kapitaleve, të Ministrisë Federale për Bashkëpunim dhe Zhvillim të Gjermanisë.
Ai ka një përvojë pune në sistemin bankar në Shqipëri dhe më pas është angazhuar si Drejtor Ekzekutiv në kompaninë “BDO Albania”, pjesë e BDO International, grupi i pestë më i madh në botë në fushën e Konsulencës Financiare, Auditit dhe Taksave.
Petrit Malaj do të zëvendësojë në këtë detyrë Ervin Meten, i cili e mbante detyrën prej Shtatorit të vitit 2023.
Një nga emrat surprizë në ndryshimet e qeverisë që njoftoi kryeministri Edi Rama në Kongresin e PS ishte edhe ai i Ervin Hoxhës.
Ervin Hoxha ka lindur në Tiranë në vitin 1978. Ai ka kryer arsimin e mesëm në Turqi ndërsa më pas ka vijuar Akademinë e Sigurisë në Dresden të Gjermanisë. Në vitin 2006 ka përfunduar studimet e larta në Fakultetin e Shkencave Sociale në Universitetin e Tiranës. Arsimin pasuniversitar e ka ndjekur në Shkollën e Lartë të Policisë gjermane në Munster.
Për më shumë se 20 vitesh ai ka shërbyer në detyra të ndryshme shtetërore nga niveli ekzekutues deri në nivele të larta drejtimi në institucione qendrore të zbatimit të ligjit në vend si Ministria e Mbrojtjes, Ministria e Brendshme, Policia e Shtetit, Ministria e Financave dhe Ministria e Drejtësisë.
Ervin Hoxha ka shërbyer si drejtor i Marrëdhënieve Ndërkombëtare në Policinë e Shtetit, Shef i Njësisë Kombëtare Europol, Shef i zyrës Qendrore Kombëtare Interpol, Drejtor i Policisë Rrugore, Drejtor i Drejtorisë së Mbrojtjes së Dëshmitarëve dhe Bashkëpunëtorëve të Drejtësisë, Drejtor i Hetimit Tatimor dhe Pastrimit të Parave, zv/drejtor i Përgjithshëm i Institutit të Sigurimeve Shoqërore, Drejtor i Përgjithshëm i shërbimit të Provës si dhe drejtor kabineti i këshilltar i disa funksionarëve të lartë të shtetit.
Aktualisht ai mbante detyrën e kryeinspektorit të Inspektoratit Kombëtar të Mbrojtjes së Territorit.
Pirro Vengu u emërua si ministër i Mbrojtjes.
Që prej vitin 2012, Niko Peleshi është anëtar i Partisë Socialiste. Emri i tij u bë i njohur një vitin 2013 ku Edi Rama në mandatin e parë të qeverisjes e emëroi si zv/kryeministër.
Në vitin 2017, ai u emërua si ministër i Bujqësisë detyrë të cilën e mbajti deri në vitin 2018. Më pas në vitin 2020, Niko Peshi në Asamblenë e PS iu ngarkua detyra si ministër i Mbrojtjes, detyrë të cilën e mbajti pothuajse për 4 katër vjet.
Ditën e sotme me ndryshimet që u bënë në qeveri në vend të Niko Peleshit si ministër i Mbrojtjes u emërua Pirro Vengu, i cili më parë ka mbajtur detyrën e drejtorit të Autoritetit Portual Durrës. Më parë ai ka mbajtur disa detyra dhe poste të rëndësishme në qeveri.
Vengu ka qenë në detyrë drejtor kabineti në Ministrinë e Jashtme dhe në vitin 2017 ka mbajtur detyrën e shefit të kabinetit të ish-ministrit për Evropën dhe Punët e jashtme, Ditmir Bushati.
Nga sot ai do te jetë si ministër i Mbrojtjes, i emëruar nga Edi Rama në mandatin e tij të tretë si kryeministër i Shqipërisë.
