Organizatat e shoqërisë civile që veprojnë në fushën e mjedisit si dhe ekspertë, shprehen kundër ndryshimeve të propozuara në ligjin “Për zonat e mbrojtura”, të paraqitura nga një grup prej 12 deputetësh të Partisë Socialiste, si dhe kundër mendimit dhe propozimeve të paraqitura nga Këshilli i Ministrave përmes një vendimi të miratuar në Shkurt të këtij vitit për lejimin e ndërtimeve të resorteve në zonat e mbrojtura.
Olsi Nika: Qëllimi është hapja e zonave të mbrojtura për zhvillimin ekonomik të vrullshëm.
Taulant Bino: Ndryshimet e këtij lloji të pakëshilluara vendosin përfundimisht vulën mbi shkatërrimin e zonave të mbrojtura dhe biodiversitetit në Shqipëri. I kërkojmë Parlamentit e sidomos qeverisë të tërhiqet nga propozimet e paraqitura deri më tani, të tregojnë transparencë, të na tregojnë cili është qëllimi i vërtetë, të hapim procesin për këshillimin e duhur mjedisor.
Sipas ekspertëve, qëndrimi i qeverisë ndaj zonave të mbrojtura është në kundërshtim me direktivat e Bashkimit Evropian.
Taulant Bino: Shkojnë në kundërshtim me frymën e ligjit aktual për zonat e mbrojtura me normat dhe praktikat më të mira europiane dhe me ¬çdo detyrim ligjor të këshillimit publik. Kemi kërkuar ndërhyrjen e Komisionit Europian në përputhje me direktivat që preken. Përveç kësaj ka iniciativa për kontakte me Parlamentin Europian që do të thotë qëndrimi ndaj integrimit të Shqipërisë ka për të qenë shumë kritik.
Sipas vendimit të miratuar nga Këshilli i Ministrave, Këshillit Kombëtar të Territorit i lind e drejta që të japi leje për hotele me 4 apo 5 yje në zonat e mbrojtura. Në këtë vendim përcaktohet se investimi për hotele me 4 yje duhet të kapë shifrën e mbi 8 milionë eurove, ndërsa për hotelet me 5 yje duhet të ketë një investim mbi 15 milionë euro dhe të jenë hotele të markave të njohura ndërkombëtarisht.
Taulant Bino: Qëndrimi i qeverisë përligj gjithë shkatërrimin e zonave të mbrojtura dhe miratimin e çfarëdolloj investimi strategjik në zemër të zonave të mbrojtura. KKT kthehet në zot të zonave të mbrojtura dhe askush nuk mund ta kundërshtojë më vendimin e saj.
Vitit 2023 regjistroi numër historik të turistëve në Shqipëri dhe sipas të dhënave të Ministrisë së Turizmit, 4.5 milionë turistë vendas dhe të huaj kanë vizituar zonat e mbrojtura. Ekspertët vlerësojnë se degradimi i këtyre zonave do të sjellë dhe ulje të numrit të turistëve të apasionuar pas natyrës./KlanNews
