Deputetja Rudina Hajdari ka zhvilluar ditën e sotme një bashkëbisedim me ambasadoren e SHBA në Tiranë, Yuri Kim. Në fokus të diskutimeve mësohet se ka qenë ndryshimet në Kodin Penal për situatën e COVID-19 dhe dënimeve.
Pëmes një postimi në rrjetet sociale, Hajdari njofton se i ka shprehur pakënaqësinë e saj për këto ndryshime. Deputetja ka thënë se ndryshimet në Kodin Penal janë të panevojshme dhe cënojnë Kushtetutën si dhe Konventën Europiane për të Drejtat e Njeriut.
Postimi i Rudina Hajdarit
Kënaqësi të bashkëbisedoja nëpërmjet video-konferencës me Ambasadoren amerikane Znj. Yuri Kim, mbi situatën e tanishme në Shqipëri.
E informova për gjendjen e vështirë në të cilën ndodhen shumë familje shqiptare, realitet të cilin e kam prekur këto ditë teksa jam munduar të ndihmoj sado pak këto familje në nevojë.
Gjithashtu shpreha shqetësimet e mia për gjendjen emergjente nga COVID-19, mbi ndryshimet e Kodit Penal, të cilat janë të panevojshme e sidomos përmenda faktin se këto ndryshime cënojnë Kushtetutën dhe Konventën Europiane për të Drejtat e Njeriut.
Gjeta rastin të falenderoja ambasadoren për kontributin e SHBA-së, me pajisje personale të mbrojtjes nga programi për Asistencë Humanitare i Komandës Europiane të Shteteve të Bashkuara në mbrojtjen e punonjësve të shëndetit në vijën e parë të luftës kundër COVID-19./ Opinion.al
