Ditën e mërkurë PD do të dorëzojë në Kuvend 3 amendamentet kushtetuese që formalizojnë 3 propozimet për Vetingun e politikanëve, zhbërjen e ndryshimeve Kushtetuese dhe reformën territoriale.
Nga selia blu, Sekretari i Përgjithshëm, Gazment Bardhi tha se këto amendamente janë në interes të qytetarëve dhe se PD duhet t’i votojë.
Bardhi la të nënkuptohej se për këto propozime PD është konsultuar dhe me ndërkombëtarët.
“Siç jeni njohur, grupi i PD dje vendosi që gjatë javës të depozitojë disa amendanmente kushtetuese. Pastrimin e politikës nga të korruptuarit dhe individëët me lidhje me krimin, ndryshimet kushtetuese dhe një reformë të re territoriale. Sot grupi i punës u mblodh për të finalizuar amendamentet dhe vendosëm që nesër të depozitojmë amendamentet kushtetuese që formalizojnë të 3 propozimet. Të 3 çështjet nuk janë në interes të PD por në interes të qytetarëve. Ka ardhur momenti që në qeveri të kemi persona të palidhur me krimin dhe që nuk janë të korruptuar dhe që nuk kanë vënë pasuri të paligjshme për shkak të korrupsionit, të kemi një reformë territoriale që çon shërbimet atje ku janë dhe një reformë zgjedhore të duhur. Sot grupi i punës ka autorizuar depozitimin e këtyre amendamenteve nesër. Detyra e opozitës është të ofrojë zgjidhje që kanë qytetarët, ne nuk shohim interesin e PD. Mazhoranca megjithë problemet që ka pas zgjedhjeve do duhet ti rikthehet interesit të qytetarëve. Deputetet e PS të mendojnë për qytetarët. Ka patur, ka dhe do ketë një proces informimi me ndërkombëtarët mbi çdo propozim të PD, e rëndësishme është që nesër i depozitojmë të 3 amendamentet”, shtoi Bardhi.
