Në përfundim të mbledhjes së Qeverisë, ministri i Brendshëm Taulant Balla, njoftoi se Këshilli i Ministrave ka miratuar ndryshime ligjore, sa i përket sistemit të Gjendjes Civile.
Balla njoftoi se do të shtohet numri i shërbimeve online të Gjendjes Civile.
“Thellimi i reformës së mëtejshme sa i përket sistemit të gjendjes civile. Do mbrojmë në Kuvend ndryshimet në ligjin për sistemin e adresave. Me këto ndryshime çohet në nivel tjetër procesi i digjitalizimit. Një ndarje shumë e mirë, mes atyre pak shërbimeve që do mbeten në formën tradicionale.
Gjatë 2 viteve të fundit, nga zyrat e gjendjes civile janë lëshuar 11.3 milionë certifikata digjitale e përkthyer në vlerë financiare të kursyer, vetëm vlera e tyre që paguheshe si shërbim është 13.2 milionë euro, pa llogaritur edhe kohën e humbur. Ky revolucion digjital ka sjellë edhe kursim të parave nga xhepat e shqiptarëve. Do e çojmë më tej përpara si shërbim” -tha Balla, ndërsa apeloi edhe një herë qytetarët të deklarojnë adresat e vendbanimit apo vendqëndrimit të tyre.
“I drejtohem me përulje dhe kërkesë çdo qytetari është detyrim ligjor deklarimi e vendbanimit dhe vendqëndrimit. I drejtohem edhe qytetarëve që jetojnë jashtë territorit. Në ligj, ne e bëjmë të detyrueshëm deklarimin e vendbanimit, shqiptarët jashtë, mund ta bëjnë online përmes portalit e-albania. Ka një sërë risish ndryshimet në ligjin për gjendjen civile. Lidhur me një shqetësim nga mediat për një fenomen të martesave fiktive, edhe kjo është rregulluar në ndryshimet që kemi sjellë në ligj”,-tha ai.
