Kreu i Partisë Demokratike, Sali Berisha, zhvilloi sot një takim me fermerët në Dimal, ku prezantoi programin e opozitës me fokus të veçantë bujqësinë
Gjatë këtij takimi, Berisha u zotua se një qeveri e drejtuar nga ai do të sjellë një ndryshim rrënjësor në mbështetjen ndaj bujqësisë.
Ai e ka quajtur një diskriminim të pafalshëm trajtimin që qeveria aktuale i ka bërë fermerëve shqiptarë, ku premtoi rritjen e fondeve për subvencione nga 32 milionë euro aktualisht, në 230 milionë euro. “Ky do të jetë zotimi solemn i yni për ju,” deklaroi ai.
Në fjalën e tij, Berisha solli si shembull vendet e rajonit, ku fermerët përfitojnë disa herë më shumë mbështetje se ata në Shqipëri. “Fermerët në Maqedoni, Kosovë, Mal të Zi dhe Serbi marrin pesë deri në tetë herë më shumë subvencione se fermerët tanë. Ndërsa këtu, nga 380 mijë fermerë që japin 19 për qind të PBB-së dhe punësojnë rreth 500 mijë shqiptarë, shteti ka lënë vetëm 32 milionë euro,” tha ai.
Kreu i PD, Berisha e përmbylli fjalën duke i bërë thirrje fermerëve që të bashkohen në këtë nismë për ndryshim, duke e konsideruar atë një hap të domosdoshëm për të rikthyer dinjitetin dhe përkrahjen që sipas tij, bujqësia shqiptare meriton.
