Kryetari i demokristianëve Nard Ndoka si i vetmi opozitar sot në sallën e parlamentit ka marrë fjalën dhe ka nxjerr edhe disa sekrete.
“Kur po vija në Parlament takoj 4-5 kolegë të mazhorancës, kuptohet nga kasa e vjetër dhe me thanë: “Pse vjen në Parlament sepse Parlamenti nuk zgjat, do të kemi maksimumi një orë punë dhe do ta mbyllim”, tha Ndoka.
Ndërsa vijoi: “Vërtet ndiheni komodë të nderuar deputetë të mazhorancës. Vërtet ju duket një risi një gjë e tillë. E keni provuar 40 vjet pa opozitë, e përmbysëm atë sistem. Sot pas 25 viteve përsëri ju ndjeheni komod se opozita nuk është në Parlament. Ndihet komod Ahmetaj se akoma dhe realisht nuk është krijuar ideja ku është që flet për opozitën dhe e shigjeton në mungesë të saj duke folur me veten duke e quajtur liderin e opozitës menaxhues. Mendoj se nuk është kjo fryma që duhet të jetë në Parlament. Zonja drejtuese e seancës, do t’ju lutesha që t’ja përcillnit edhe Metës dhe në Konferencës së Kryetarëve që ju e keni kthyer Kuvendi në një arenë kacafytjesh dhe jo debatesh dhe kjo sepse është ndryshuar rregullorja”.
