Kreu i PDK-së, Nard Ndoka e ka konsideruar një dështim të madh qeverisjen katërvjeçare të kryeministrit Rama.
Me anë të një shënimi në facebook, Ndoka shkruan se Rama dështoi me qeverisjen e tij në ekonomi, infrastrukturë, shëndetësi, arsim, bujqësi, rend dhe kudo tjetër.
Ai thekson edhe pse po bëhen katër vjet qeverisje, Rama, flet akoma si opozitar dhe kërkon dy mandate të tjera për të vazhduar ato që nuk i nisi kurrë.
“I vetmi investim ‘strategjik’, lungomarja e famshme, që është filluar dhe shpresojmë të përfundojë, që mos t’ketë alibi për të kërkuar përsëri votën e vlonjatëve!”, shkruan Ndoka.
Sipas tij, kryeministri Rama për katër vite nuk nisi asgjë dhe nuk përfundoi asgjë nga ato që qeveria e Berishës kishte nisur dhe vota e qytetarëve ja la në mes.
Vepra si rruga e kombit, hyrja e tunelit të Elbasanit, rruga e Arbërit dhe shumë investime të tjera.
“Vendi kërkon mendje dhe ndërhyrje me mend, ky kryeqeveritar, merret me sheshe urbane, njësoj si një Zot shtëpie, që nuk ka guzhinë fare, dhoma e gjumit nuk ka dyshek e jorgan, pa televizor e ngrohje dhe ky i vendos banjos bide!”, thekson Ndoka.
“Ky Zot Shqipërie, kur populli i tij nuk ka punë, zhytet çdo diëe në varfëri, emigron, vuan, drobitet, humb besimin për të jetuar, ndërsa Zoti i Shqipërisë merret me hallin e Ballkanit, darkon me Thaçin në Prishtinë dhe i shpall luftë Serbisë, drekon në Stamboll dhe i puth tajaren Erdoganit!
Erdogani një lider problematik me të drejtat e njeriut, medias, pakicave dhe me popullin e vet, të cilit i marrin aeroportin shtetror me grushtshteti, Zoti i Shqipërisë tonë, i kërkon të ndërtojë aeroport në Vlorë, Tepelenë, Qiparo e Divjakë dhe nalla për qeverinë!
Njësoj si të kërkosh kos te magjypi, kur ai nuk ka as bukë!
Fushata ka filluar, mashtrimet nuk do kenë të sosur, investime me projekte miliardash, që shfaqen vetëm në monitor duke gënjyer veten dhe popullin e tij!
Sa turp, sa rëndë për ta besuar dhe duruar akoma më shumë! Zgjohu popull opozitar, 18 Shkurti, është një prove dhe mundësi për të gjithë!”
