Edhe kryetari i Partisë Demokristiane Nard Ndoka ka firmosur marrëveshjen me Partinë Demokratike. Ai ka folur për mediat, duke thënë se Lulzim Basha po ndërton “ekipin kombëtar”. Duke vazhduar me metaforën e ekipit, Nard Ndoka ka thënë se kryeministri Rama po përpiqet të luftojë me ekipin e të rinjve në Parlament, apo me ekipin e të vjetërve jashtë tij.
“Sistemi nuk funksionon fare, ndryshe nga e majta e çoroditur, sot Basha po ndërton ekipin kombëtar, nëse mund ta cilësoja kështu, me vlerat e veta, pa i blerë lojtarët si zoti Rama, përkundrazi jemi bërë pjesë me vlerat tona programore. Rama po tenton të ketë përballë ekipin e të rinjve që dështoi në Parlament, edhe ai e kuptoi se nuk mund të jetë ekip real. Po përpiqet me ekipin e vjetër të opozitës jashtë parlamentit, por besoj se edhe ky do të jetë dështim. I bëj thirrje zotit Rama ta kuptojë realitetin”, tha Ndoka.
Sot partitë e koalicionit të djathtë nënshkruan një marrëveshje me Partinë Demokratike, për të mos lejuar zgjedhjet pa opozitën. Nga ana tjetër, pritet që në KQZ të regjistrohet partia e re e djathtë, “Bindja Demokratike”./Opinion.al
