Në Konferencën e Kryetarëve, deputeti i PD Agron Gjekmarkaj i kërkoi kryetares së Kuvendit, Lindita Nikollës që mos ta kthejë Parlamentin në një burg.
Ai mori fjalën gjatë mbledhjes së Konferencës së Kryetarëve dhe shprehu mosdakordësi për mos lejimin e kolegëve të tij në mbledhje.
“Ju lutem mos e shndërroni Parlamentin në një burg. Nuk është një segment për mazhorancën dhe opozita të rrijë përtej mureve. Ajo është e barabartë në këtë institucion. Ky është një skandal i vërtetë. Keni përgjegjësi, Kjo ndodh vetëm në vendet autoritare ku opozita rrethohet me gardistë. Ky nuk është Parlament normal, kjo nuk është sallë normale. Anormaliteti nuk sjell normalitet. Kjo sjell revoltë, sjell protestë. Protesta merret parasysh, nga protesta reflektohet. Bëhuni të përgjegjshëm. Mos silleni si manikin që zbatoni porosi” tha Gjekmarkaj.
Disa nga deputetët e opozitës nuk janë lejuar që të marrin pjesë në mbledhjen e Konferencës së Kryetarëve në Kryesinë e Kuvendit ku raportoi ministri i Financave Ervin Mete.
Punonjës të Gardës formuan një kordon tek shkallët duke mos lejuar opozitën që të hyjë në sallën e mbledhjes.
Brenda Konferencës së Kryetarëve, nga deputetë të opozitës u lejuan vetëm Agron Gjekmarkaj dhe Zhani Gjergji./Opinion.al
