Analisti Agron Gjekmarkaj me anë të një shkrimi në gazetën “Panorama” me titull: ‘Ndjesa e Bashës dhe “besa” e Ramës për plehrat’, shkruan se Lulzim Basha e zuri në befasi opinionin publik me ndjesën e tij kritike për çështjen e ligjit të plehrave, të miratuar nga qeveria e djathtë në vitin 2011 e të rikthyer zhurmshëm si mrekulli nga Edi Rama i cili pështyu mbi të i sapomartuar me pushtetin mes aklamacionit populist.
“Edi Rama dikur “përgjakur” betejash si kalorësi antiplehër, tani ka zbritur prej kalit dhe i ka lidhur duart në bishtin e tij. Gjogu ngarkuar me halet e Europës, pasi ka kaptuar male e fusha, do të ecë haravan nëpër udhët e Shqipërisë, duke pritur formalizimin përfundimtar të ligjit, të cilin me gjasë Presidenti Nishani duhet ta refuzojë, akt ky që kjo maxhorancë miratoi me 63 vota disa ditë më parë. Shoqëria civile, për të cilën mendohej se ishte në prag asgjësimi, u kthye furishëm në bulevardin kryesor të Republikës, duke sjellë pak shpresë për të protestuar ndaj një fenomeni të pështirë që do të ndotë rëndë jetën tonë të përditshme, si dhe do ta korruptojë atë edhe më tej”, shkruan Gjekmarkaj.
Ai thekson se duke shkelur paftyrësisht mbi premtimet e veta, duke tejkaluar çdo gënjeshtër “të pranueshme”, duke cenuar rëndë cilësinë e një jete tashmë kaq të vështirë në këtë vend, i bie që kryeministri ynë është hall të madh.
Nëse nuk është kjo, sipas Gjekmarkajt, i druhet fort dikujt, ose një ofertë korruptive e madhe gazep i ka rënë si sherbet mbi mide.
“Në hall të madh ngjan të jetë edhe shoqëria, e cila nuk është e zonja që hallin e kryeministrit ta heqë nga vetja dhe ta shndërrojë në problem politik e personal të tijin me zgjidhje në gjykatat e Tiranës, të cilat presin vetingun e Ramës si cjapi te kasapi”, shkruan ai.
