Lajm i bujshëm ai që vjen nga Spanja: FIFA ka marrë tashmë vendimin në lidhje me afrimin e lojtarëve minorenë nga Real Madridi dhe Atletiko e Madridit.
Verdikti është i njëjtë si ai që dënoi Barcelonën një vit më parë, sepse është e njëjta histori, të njëjtat lëvizje të kryera edhe nga gjigantët e Madridit, që kanë shkelur rregullat e FIFAs në lidhje me transferimin e lojtarëve nën moshën e lejuar.
Për pasojë, tashmë është zyrtar dënimi, me Realin dhe Atletikon që do të ndalohen të shesin dhe blejnë lojtarë duke nisur që nga kjo periudhë e merkatos e deri në fund të vitit aktual.
Një lajm i tillë është një goditje e rëndë për të dy klubet, por sidomos për Realin, që është mësuar të bëjë blerje të mëdha, por tani duhet të luajë një vit rresht me të njëjtët lojtarë
Problem madhor për Realin do të jetë edhe një dënim i mundshëm i sulmuesit Karim Benzema, në lidhje me hetimin mbi shantazhin ndaj Valbuenasë.
Dënimi i Realit për një vit është goditje e rëndë edhe për mediat, sepse tashmë nuk mund të shkruajnë çdo 3 ditë lajme në lidhje me ofertat dhe largimin e mundshëm të Kristiano Ronaldos apo Geret Bejlit, që janë “të burgosur” për një vit në Madrid tashmë. /Sportal.al
