Gjatë seancës para Komisionit parlamentar të Medias në Kuvend ku po raporton ministrja e Kulturës, Mirela Kumbaro për ndërtimet në Parkun arkeologjik të Butrintit, ajo ka pranuar se UNESCO-n nuk e ka pyetur për çdo projekt, ndërsa për çështjen konkrete të punimeve të brendësi të parkut i është drejtuar UNESCO-s për marrje mendimi pasi problemi është bërë publik. Gjatë sences deputeti i PS Alket Hyseni tha se kjo çështje prek interesin e qytetarëve.
“UNESCO nuk aprovon projekte në sitet arkeologjike në të gjithë botën. Nëse UNESCO ka pyetje bën, nëse nuk ka pyetje s’bën. Komunikuam drejtpërdrejt me zyrën e UNESCO në Paris. Ne nuk kemi detyrim t’i dërgojmë UNESCO-s për çdo projekt. Raporti i është dërguar UNESCO-s, ia kemi dërguar edhe me email në anglisht pas publikimit të debatit”, tha Kumbaro.
Drejtuesja e komisionit, deputetja e PD, Albana Vokshi i kërkoi Kumbaros të ndërpresë menjëherë punimet. Vokshi tha gjithashtu se Kumbaro nuk i ka vënë në dispozicion komisionit të medias komunikimin e Ministrisë së Kulturës me UNECSCO-n.
Ndërkohë, kundër Kumbaros për atë që po ndodh në Butrint është rreshtuar edhe deputeti i PS në Sarandë, Alket Hyseni. Ai tha se ka një shqetësim real dhe të drejtë të qytetarëve për ndërtimin brenda parkut të Butrintit. “Kjo është një çështje sensitive, prek interesin e qytetarëve”, tha Hyseni.
Ndërkohë deputeti i PS, Fidel Ylli i ka kërkuar kolegëve që mos ta kthejnë në show mediatik. “Mos e ktheni në show televiziv zonja Vokshi. Jam me ju por mos e ktheni në show”, është shprehur Ylli ./Opinion.al
