Rektorati i Universitetit Bujqësor të Tiranës e ka quajtur ndërtimin e shkollës në Kodër-Kamëz si një domosdoshmëri për komunitetin. Në një deklaratë për mediat, zëdhënësi i Senatit Akademik të UBT-së ka thënë se përgjatë këtyre ditëve, informacionet e shpërndara nga mediat nuk kanë qenë të sakta, pasi rektorati nuk ka qenë asnjëherë kundër ndërtimit të një shkolle që do t’i vijnë në ndihmë komunitetit.
“Jemi të bindur se ndërtimi i shkollës është domosdoshmëri për komunitetin dhe Senati Akademik, megjithëse kjo sjell një ndarje të kampusit të universitetit, mbështet çdo nevojë të komunitetit. Shkolla është vepër e mirëpritur. Takimet e ditëve të fundit qartësuan marrëdhëniet juridike dhe procedurale. Senati mbështet unanimisht marrëveshjen e lidhur mes UBT-së, ministrisë dhe bashkisë së Tiranës për paktin për universitetin”, thuhet ndër të tjera në deklaratën e UBT.
Gjatë këtyre ditëve, pedagogë dhe studentë të Universitetit Bujqësor të Tiranës kanë protestuar kundër ndërtimit të shkollës në territorin e fidanishtes së universitetit, pasi sipas tyre cenohej territori dhe zhdukej një hapësirë e nevojshme për praktikat mësimore. Nga ana tjetër, kryebashkiaku Erion Veliaj ka qenë i vendosur për të vazhduar me ndërtimin e shkollës./Opinion.al
