Ka ndërruar jetë në spitalin e Traumës, 80-vjeçari Shaban Agaj, i cili javën e kaluar u plagos me thikë nga nipi i tij në zonën e Freskut në Tiranë. Prej 6 ditësh ai ndodhej në terapi intensive. Bashkëshortja e tij, Hajrie Agaj e cila u plagos po ashtu nga nipi ndodhet në rrezik për jetën në spital. Nisur nga këto rrethana, tashmë ka ndryshuar edhe akuza për autorin e krimit në familje, 19-vjeçarin Beniamin Kaso, që u arrestua menjëherë pas ngjarjes. Tashmë ai akuzohet për “vrasje për shkak të marrëdhënieve familjare”.
“Në vijim të komunikatës që bën fjalë për veprën penale ‘vrasje për shkak të marrëdhënieve familjare’ dhe ‘prodhim, mbajtje, blerje apo shitje pa leje e armëve të ftohta’, më datë 17 tetor, shtetasi Shaban Agaj ka ndërruar jetë në spital”, tha dje zyrtarisht Policia e Tiranës.
Ngjarja e rëndë ndodhi më 12 tetor, në zonën e Freskut. Benjamin Kaso plagosi me thikë dy gjyshërit e tij, Shaban dhe Hajrie Agaj pas një konflikti.
Sipas burimeve nga Policia, autori i ngjarjes ishte kthyer nga Gjermania disa ditë më parë. Ndërsa debati me gjyshërit ka ndodhur për shkak të një shume parash që e ëma i kishte nisur dhe ata nuk ia kishin dhënë, pasi kishin frikë se do t’i shpenzonte.
