Edhe pse kreu i grupit parlamentar të PD-së, Gazment Bardhi, ka kërkuar disa herë rradhazi nga Spiropali që të niste seancën me interpelancë të kryeministrit Rama për çështjen “Becchetti”, kjo kërkesë nuk është pranuar.
Spiropali e hodhi në votim këtë kërkesë, e cila u rrëzua.
Nga ana tjetër, Bardhi ka thënë se kryeministri nuk mund të vërë kushte se kur paraqitet dhe kur nuk paraqitet në kuvend.
“Në datën 2 dhjetor të këtij viti, në përputhje me nenet e kushtetutës, kam kërkuar një interpelancë me kryeministrin sa i takon informacioneve të bëra publike që 130 milionë euro të qytetarëve shqiptarë janë bllokuar për llogari të ekzekutimit të vendimit të arbitrazhit ndaj televizionit Agon.
Ju keni thënë se kryeministri nuk mund të ishte prezent, por do të ishte në seancën e radhës. Në këtë kuptim, ju zonja kryetare kishit detyrimin që sot si pikë të parë të rendit të ditës të vendosnit interpelancën me kryeministrin.
Kryeministri nuk mund të vërë kushte se kur paraqitet dhe kur nuk paraqitet në kuvend sipas detyrimit që ka nga Kushtetuta e Republikës. Ndërsa kushti që ka vendosur nuk varet nga Kuvendi, nëse i vëllai i tij Olsi Rama është apo jo i përfshirë në çështjen “Xibraka” dhe kërkesa e tij që të mbyllen hetimet nga SPAK, nuk është një kërkesë për Kuvendit, mund të jetë shantazh ndaj Prokurorisë, por jo kusht kushtetues ndaj Kuvendit.
Thërrisni Ramën të vijë këtu dhe të japë llogari për atë informacion që ka dalë në media. Ne disponojmë edhe të gjitha dokumentacionet përkatëse. Kishte thënë aty që nuk ka asnjë letër të shtetit shqiptar. Patjetër! Kur nuk ka ekzekutimin vullnetar por ekzekutim të detyrueshëm nuk ka letra nga shteti shqiptar, por vendim nga gjykata belge. Ndërprisni seancën, detyrojeni të mos fshihet, të vijë të japë llogari siç e detyron Kushtetuta”, tha Bardhi.
