Këshilltari Special, Robert Mueller, zyrtari amerikan që ka udhëhequr hetimet për ndërhyrjen e supozuar ruse në zgjedhjet presidenciale të vitit 2016 në Shtetet e Bashkuara, do të dëshmojë para Kongresit.
Ish-shefi i FBI-së do të përballet me pyetje në dy seanca, fillimisht do të paraqitet para Komitetit Gjyqësor të Dhomës së Përfaqësueve për gati tri orë, dhe më pas do të përballet me pyetje të tjera për dy orë para Komitetit të Inteligjencës.
Dëshmia e tij vjen gati tre muaj pasi ai ka publikuar raportin për fushatën e presidentit amerikan, Donald Trump dhe Rusisë.
Në raportin me 448 faqe nuk është vërtetuar se fushata e Trumpit ka bashkëpunuar me Moskën për të ndërhyrë në zgjedhje. Megjithatë, aty janë përmendur 10 raste kur Trump, me shumë mundësi ka tentuar të pengojë hetimet për çështjen ruse.
Mueller pritet të përballet me këto lloj pyetjesh dhe për procesin e hetimeve, ashtu sikurse edhe me dilemën nëse ka pasur bazë për të akuzuar presidentin për kryerje të krimit apo jo./Opinion.al
