Udhëheqësit demokratë të Senatit amerikan i bënë thirrje administratës së presidentit Trump që të vendosë sanksione kundër Rusisë pasi zyrtarët e inteligjencës amerikane njoftuan Kongresin se Rusia po përpiqet sërish të ndërhyjë në zgjedhjet presidenciale në SHBA.
Senatorët demokrat i kërkuan sekretarit të Shtetit, Mike Pompeo, dhe sekretarit të Thesarit, Steven Mnuchin, që të sanksionojnë Qeverinë ruse dhe çdo individ të përfshirë në ndikimin e zgjedhjeve të nëntorit.
Kërkesa e tyre vjen pak ditë pasi zyrtarët e inteligjencës amerikane mbajtën një konferencë me dyer të mbyllura me ligjvënësit e Dhomës së Përfaqësuesve.
Gjatë kësaj konference, ligjvënësve u është thënë se Rusia dhe vendet e tjera janë duke kërcënuar integritetin e zgjedhjeve në SHBA. Po ashtu është thënë se Rusia po përpiqet ta ndihmojë presidentin Trump për rizgjedhje.
Por i dërguari i presidentit rus, Vladimir Putin, mohoi akuzat teksa foli në një intervistë për të përditshmen ruse, Kommersant.
“Ne e respektojmë në mënyrë rigoroze dhe të përpiktë parimin e mosndërhyrjes në çështjet e brendshme të Shteteve të Bashkuara, i vendosur më 16 nëntor të vitit 1933, kur Rusia sovjetike dhe Shtetet e Bashkuara i kanë rivendosur marrëdhëniet e tyre diplomatike”, tha Andrei Krutskikh, i dërguari special i Putinit për bashkëpunimin ndërkombëtar në sigurinë e informacionit.
“Presidenti vazhdimisht ka theksuar se Rusia nuk ka ndërhyrë kurrë dhe nuk do të ndërhyjë në punët e brendshme të SHBA-së, përfshirë proceset zgjedhore”, shtoi Krutskikh./Opinion.al
