Në mbledhjen e Asamblesë Kombëtare të Partisë Socialiste, kryeministri Edi Rama ndryshoi tre drejtues në qarqet e Tiranës, Shkodrës dhe Lezhës. Ajo që ra në sy, ishte përjashtimi i Ditmir Bushatit nga qarku i Shkodrës ndërsa gjatë krizës politike para 30 qershorit ai ka bërë deklarata kritike, duke kërkuar një marrëveshje. Po ashtu ai ka mbajtur qëndrime të ndryshme nga Rama sa i përket çështjes së Kosovës.
“Kjo parti duhet ti takojë njerëzve shumë më shumë seç u ka takuar sepse njerëzit i dhanë kësaj partie mundësinë që të shënojë një tjetër moment për të qenë krenar në historinë e saj, 30 qershorin. Secili nga ju ka një detyrë dhe do të vlerësohet nga vetë procesi, dëshiroj që që tani të propozoj disa ndryshime, së pari në udhëheqjen e qarqeve, në qarkun e Shkodrës, qarkun do ta drejtojë kryetari i bashkisë Shkodër, Tiranën ta drejtojë Elisa Spiropali dhe Ervin Bushati. Qarkun e Lezhës ta drejtojë Sandër Lleshi. Ndërsa për Lindita Nikollën kam një tjetër propozim që do e diskutojmë më pas. Për sekretariatin kemi rënë dakord që të bëjmë disa axhustime të nevojshme”, tha Rama.
Deri më tani në krye të drejtimit të qarqeve të Shkodrës, Lezhës dhe Tiranës kanë qenë: Ditmir Bushati për Shkodrën, Blerina Gjylameti për Tiranën dhe për Lezhën Lindita Nikolla.
Ndryshimet që bëri PS-ja në asamblenë e sotme
Valdrin Pjetri-koordinator për qarkun e Shkodrës në vendin e Ditmir Bushatit
Sandër Lleshaj-koordinator për qarkun e Lezhës në vendin e Lindita Nikollës
Elisa Spiropali dhe Ervin Bushati-koordinator në Tiranë në vendin e Blerina Gjylametit
Gent Cakaj do të marrë sekretariatin për Rininë
Blerina Gjylamenti kalon te sekretariati për dixhitalizimin
Arben Pëllmbui-sekretar për koordinimin dhe organizimin
Lindita Nikolla-sekretare për burime njerëzore në PS/ Opinion.al
