Kreu i Dhomës së Përfaqësuesve në Kongresin Amerikan, Mike Johnson ka dalë kundër idesë së financimit të mëtejshëm të Ukrainës. Republikani shtpi se nëse Donald Trump fiton zgjedhjet elektorale të nëntorit, do t’i japë fund luftës midis Ukrainës dhe Rusisë.
“Unë nuk kam dëshirë për financim të mëtejshëm për Ukrainën dhe shpresoj se nuk është e nevojshme. Nëse Trump fiton, unë besoj se ai mund t’i japë fund konfliktit”, tha ai. “Unë mendoj se të gjithë në botë janë të lodhur dhe duan që ky konflikt të zgjidhet, por nëse Kamala Harris do të bëhej presidente, nuk mendoj se do të përfundonte: dhe ky është një skenar i dëshpëruar dhe i rrezikshëm”.
Sakaq, Rusia pretendon se ka goditur infrastrukturën energjetike që furnizonte kompleksin ushtarako-industrial të Ukrainës. Sipas Ministrisë ruse të Mbrojtjes, të cituar nga agjencia Ria Novosti, “aviacioni taktik-operativ, dronët, forcat raketore dhe artileria dëmtuan infrastrukturën energjetike që siguronte funksionimin e kompleksit ushtarak-industrial”.
Ndërkohë mediat ndërkombëtare kanë bërë të ditur ekzistencën e një ditari të opozitarit më të famshëm në Rusi, tashmë i vdekur, Alexei Navalny. Në ditar zbulohet se, Navalny e ka ditur për fundin e tij tragjik. “Unë do ta kaloj pjesën tjetër të jetës sime në burg dhe do të vdes këtu,” shkroi Navalny në ditarin e tij ndërsa ishte në paraburgim në mars 2022, sipas fragmenteve të publikuara nga The New Yorker . “Nuk do të ketë njeri atje për të thënë lamtumirë,” shkroi Navalny.
Kritiku më i shquar i presidentit rus Vladimir Putin, vdiq më 16 shkurt në një burg rus në Arktik ku po vuante një dënim me 19 vjet burg. Libri i ri, i titulluar “Patriot”, bazohet në shënimet e ditarit të Navalny nga burgu dhe periudha e mëparshme. Ai do të publikohet më 22 tetor.
Mbështetësit e Navalny dhe politikanë të shumtë perëndimorë fajësojnë udhëheqjen ruse dhe presidentin Vladimir Putin për vdekjen e figurës së opozitës. Një raport i revistës “The Insider” e ka mbështetur së fundmi këtë teori, pasi thuhet se ai ka shfaqur simptoma të helmimit pak para vdekjes.
