Agjenti i krimeve për zonën e ish-Bllokut, Ledio Bako është arrestuar nga policia mbrëmjen e së martës pasi dyshohet se është pjesë e një rrjeti trafiku të lëndëve narkotike.
Bako është ndaluar në zonën e Linzës në Dajt në momentin kur po udhëtonte më makinë me 3 persona të tjerë. Atij ju gjendën në makinë një sasi prej 30 gramësh lëndë narkotike dhe një armë pa leje.
Agjenti i krimeve në komisariatin numër dy, Tiranë, dyshohej nga Shërbimi për Çështjet e Brendshme dhe Ankesave pranë ministrisë së Brendshme se ishte pjesë e një grupi që shpërndanin drogë në zonën e ish-Bllokut. Nga burimet e policisë bëhet me dije se ndaj grupit janë kryer filmime dhe fotografime në terren për të dokumentuar aktivitetin kriminal.
Bako tashmë akuzohet për shpërndarje narkotikësh, shpërdorim detyre, dhe armëmbajtje pa leje. Ndërsa tre personat që u arrestuan me të akuzohen për prodhim dhe trafikim të lëndëve narkotike. /Opinion.al
