Një shqiptar në kërkim ndërkombëtar në Itali për trafik droge ka rënë në prangat e policisë së Elbasanit.
Sipas njoftimit të policisë 45-vjeçari Shpëtim Pepa është dënuar në Itali me 10 vjet e 6 muaj heqje lirie për veprën penale “Trafikimi i lëndëve narkotike”.
Pritet që 45-vjeçari të ekstradohet drejt Italisë ku do të vuajë dënimin e përcaktuar nga Gjykata e Firences në Itali.
Njoftimi i Policisë:
Vijon puna për kapjen e persona të shpallur në kërkim ndërkombëtar.
Arrestohet një shtetas shqiptar me qëllim ekstradimi drejt Italisë.
Specialistët për Hetimin e Narkotikëve në Drejtorinë Vendore të Policisë Elbasan në bashkëpunim me Interpol Tirana pas një pune të mirë organizuar, lokalizuan, kapën dhe arrestuan përkohësisht me qëllim ekstradimi drejt Italisë shtetasin shqiptar të shpallur në kërkim ndërkombëtar:
• Shpëtim Pepa, 45 vjeç, banues në fshatin Gradishtë, Belsh.
Kapja dhe ndalimi i tij u bë pasi Gjykata e Florences/ Itali, e ka dënuar me 10 vjet e 6 muaj burg, për veprën penale “Trafikimi i lëndëve narkotike”.
Veprimet e mëtejshme për këtë shtetas do të kryhen nga Zyra e Interpolit Tiranë./Opinion.al/
