Ka ndërruar jetë në moshën 53-vjeçare sipërmarësi i njohur Dritan Mezini.
Mezini ishte drejtor ekzekutiv i “DM Consulting Services” në Shqipëri dhe Kosovë, dhe bashkë-themelues i portalit duapunë. Ai ka kontribuar ndjeshëm në zhvillimin e sektorit të teknologjisë dhe sipërmarrjes në rajon.
Për ndarjen e tij nga jeta ka reaguar me një mesazh të postuar në rrjetet sociale edhe kryeministri Edi Rama.
Rama shkruan se nuk e beson dot ndarjen nga jeta të Mezinit, i cili dje pasdite ishte ulur në një të njëjtën tryezën me të në Këshillin Ekonomik Kombëtar.
“Nuk e besoj dot që Dritan Mezini nuk është më sot, teksa dje pasdite ishte me ne në tryezën e Këshillit Ekonomik Kombëtar.
Nuk e njihja personalisht nga afër, por fjalët për të ishin gjithnjë të mira dhe fjalët e tij ishin gjithnjë interesante. Një anëtar i spikatur i shumë organizatave, shoqatave, forumeve e platformave, njëkohësisht dhe një sipërmarrës i suksesshëm në fushën e teknologjisë së informacionit, si edhe një mentor i shumërespektuar për plot të rinj lidhur me inovacionin e me tregun e punës. Keqardhje e madhe! U prehtë në paqe”, shkruan Rama.
