Është ndarë nga jeta në moshën 70-vjeçare këngëtari i njohur grek Vassilis Karras.
Prej dy vitesh ai po përballej me kancerin, ndërkohë kohët e fundit Karras ishte prekur edhe nga COVID-19 dhe po trajtohej në një spital në Selanik.
Në moshën 16-vjeçare ai bëri paraqitjen e tij të parë në një lokal në Selanik, por me kalimin e viteve arriti të bëhej një nga këngëtarët më popullorë në Greqi.
Në vitin 1980 ai publikoi albumin e tij të parë me titull “Paragkes Kai Palatia”, i cili pati një ndikim të madh në botën e muzikës greke, kryesisht tek ndjekësit.
Më vonë disqet dhe këngët e Vassilis Karras u bënë hite brenda pak vitesh, ku arriti të bëhej këngëtari popullor numër një në Greqi për nga audienca.
Ai ka kënduar edhe duete të suksesshme me shumë këngëtarë të njohur apo grupe muzikore si Marianthi Kefala, Pyx Lax, Konstantina, Anxhela Dimitriou, Tolis Voskopoulos, Nikos Zoidakis, Kaiti Garbi, Despina Vandi, Elli Kokkinou, Irini Merkouri, Paola, Pantelis Pantelidis, etj.
Artisti ishte gjithashtu kompozitor dhe tekstshkrues në shumë hite të mëdha të skenës muzikore greke.
Vassilis Karras është një artist shumë i njohur edhe për shqiptarët, pasi ka dhënë disa koncerte në Tiranë dhe në Korçë.
