Është ndarë nga jeta në moshën 98-vjeçare ish-prokurori dhe ish-Kryetari i Gjykatës së Lartë në regjimin e diktaturës, Aranit Çela. Emri i tij u lidh me dënimin dhe ndëshkimin e qindra apo mijëra shqiptarëve gjatë kohës së rregjimit komunist, të cilit i shërbeu.
Pas rënies së komunizmit, ai u dënua për shërbimin e tij në diktaturë, por fitoi pafajësinë pas vitit 1997.
Çela u lind në Vlorë më 1923, në një familje me origjinë nga Kanina. Në mars 1945- shtator 1946, menjëherë pas luftës u emërua prokuror ushtarak në Shkodër, në qytetin ku zhvilloheshin përditë proceset politike të kohës.
Më 1946-1948 vazhdon me këtë cilësi por në divizionin e Korçës. Më 1948-1949 është ndihmësprokuror i Prokurorisë Ushtarake. Në vitet 1949-1953 ndjek studime në fushën e drejtësisë në Bashkimin Sovjetik. Më 1953-1954 ishte nënkryetar i Degës së Hetuesisë së Sigurimit të Shtetit. Më 1954-1955 prokuror në Prokurorinë e Përgjithshme. Më 1955 – 1958 dhe 1966 – 1990 kryetar i Gjykatës së Lartë. Më 1958 – 1966 prokuror i përgjithshëm. Më 1958 – 1991 deputet i Kuvendit Popullor dhe anëtar i Komitetit Qendror të Partisë së Punës së Shqipërisë. Çela ishte ndër të paktët persekutorë të komunizmit, i mbetur ende në jetë./Opinion.al
