NATO do të vendosë përkohësisht avionë vëzhgimi të Sistemit të Paralajmërimit dhe Kontrollit Ajror (AWACS) në Lituani. I pari nga dy avionët mbërriti të enjten (28 shtator 2023) dhe do të kryejë misione për të monitoruar aktivitetin ushtarak rus pranë kufijve të Aleancës.
“Lufta e agresionit të Rusisë kundër Ukrainës ka rritur fokusin tonë në mjedisin e sigurisë në rajonin e Detit Baltik”, tha zëdhënësi në detyrë i NATO-s, Dylan White.
“AWACS-ët tanë mund të zbulojnë avionë dhe raketa qindra kilometra larg, duke i bërë ato një aftësi kyçe të paralajmërimit të hershëm për NATO-n. Falenderoj Lituaninë për pritjen e avionit. Ky është një kontribut i rëndësishëm për sigurinë tonë të përbashkët.”
Në përgjigje të luftës së Rusisë në Ukrainë, NATO ka rritur praninë e saj ajrore në pjesën lindore të Aleancës duke përdorur avionë luftarakë, aeroplanë vëzhgimi dhe cisterna. Në vazhdën e sulmeve ruse të dronëve pranë territorit të NATO-s, Shtetet e Bashkuara javën e kaluar vendosën katër avionë luftarakë shtesë F-16 në Rumani për të përmirësuar misionin e policisë ajrore të NATO-s. Që nga shkurti i vitit 2022, AWACS i NATO-s ka kryer qindra fluturime mbi Evropën Lindore për të monitoruar avionët luftarakë rusë.
AWACS do të nisë fluturimet e tyre të zbulimit mbi territorin e Aleancës në ditët në vijim. Misioni është planifikuar të zgjasë disa javë. Avioni i përket një flote prej 14 avionësh vëzhgimi në pronësi të NATO-s me bazë në Geilenkirchen, Gjermani. Rreth 150 personel ushtarak do të vendosen në Šiauliai në mbështetje të avionit./Opinion.al
