TIRANË- Dy atentate dhe një shpërthim eksplozivi kanë tronditur mbrëmjen e së mërkurës Tiranën. Një ekzekutim i tipit mafioz u shënua në zonën e Bllokut rreth orës 22:00 ku mbeti i vrarë Ajet Zeqaj, 35 vjeç nga fshati Qesarat i Tepelenës.
Ngjarja ndodhi pranë një pike bastesh sportive në rrugën “Nikolla Tupe”, në kohën kur viktima së bashku me një mikun e tij sapo kishin dalë nga lokali kur janë qëlluar me pistoletë me silenciator.
Burimet thanë se 35 vjeçari ka marrë goditje fatale në kokë që i ka shkaktuar vdekjen e menjëhershme. Pas krimit, autori është larguar menjëherë nga vendngjarja.
Mësohet se Ajet Zeqaj ishte kthyer nga Franca vetëm 20 ditë më parë dhe policia po heton edhe aktivitetin e tij atje. Sakaq më herët ai mësohet se ka punuar në polici.
Më herët rreth orës 20:00 një biznesmen ndërtimi ka qenë në shënjetrën e një atentati. Lulzim Kazani, reth 56 vjeç u qëllua me armë zjarri tek “Komunën e Parisit” teksa ishte në makinë me bashkëshorten.
Mësohet se ai ka marrë plumba në trup dhe është dërguar menjëherë për në Spitalin e Traumës ku ndodhet jashtë rrezikut për jetën.
Ndërkohë rreth orës 19:00 të mbrëmjes së djeshme i është vënë tritol një eskavatori në rrugën 5 Maji në Tiranë. Sipas policisë, brenda rrethimit të një kantieri ndërtimi, ka patur një shpërthim, ku si pasojë është dëmtuar vetëm një makineri ndërtimi gërmuese. Dyshohet se shkak të jetë konflikti midis ndërtuesve dhe pronarëve të tokës.
