Nard Koka nuk është një emër i panjohur. Ai madje thuhet se është kumbari i darkës me ngjala në Lalz mes Ramës e Metës, 3 vite më parë, ku u ngjiz edhe koalicioni i ri PS-LSI. Koka është vëllai i ministrit të LSI, Lefter Koka.
Emri i tij del në skenë pasi ka influencuar emërime në diplomaci, madje shkon deri aty sa kërcënon ministrin e Jashtëm Ditmir Bushati për shkarkimin e konsulles në Milano.
Ai publikoi një SMS ku shante ministrin me “liber shpie” ministrin. Gjithashtu Nard Koka tha se në ditët në vijim do të flasë për emërimet klienteliste të Bushatit në diplomaci, si rasti i konsullit të Barit në ambasadën tonë në Katar, Edmond Caca, por dhe konsullin shqiptar në Turqi, Gent Gazheli, duke e emëruar në Romë, raporton gazeta “Panorama”.
Në mars të këtij viti, konsullja shqiptare në Milano është shkarkuar
nga ministri Bushati pas zbulimit që një emision investigativ ka bërë
duke e akuzuar atë se kishte marrë 1 mijë euro për të dhënë
certifikatë martese për një shtetase shqiptare në Itali.
Luljeta Çobanaj, ishkonsullja e shkarkuar, ditën e shkarkimit ka
akuzuar deputetin Eduard Ndocaj se, pasi mori mandatin, kërkonte
privilegje dhe shërbime të paligjshme nga kjo konsullatë.
“Pas zgjedhjes deputet, kërkoi ta trajtonte konsullatën e Milanos si
çiflig të vetin. Kërkonte makinat ose favore për persona të caktuar, të
cilat unë nuk kam mundur t’ia plotësoj, kur kanë qenë në kundërshtim me ligjin, pasi konsullata nuk është shërbim taksish”, është shprehur Çobanaj.
Nard Koka publikoi SMS e bisedës me Bushatin dhe konfirmoi për
gazetën “Panorama” se SMS-ja është nisur prej tij në telefonin e
ministrit Bushati, nga i cili ka marrë reagimin që është i dukshëm në
këtë mesazh.
Duke folur për gazetën “Panorama”, vëllai i ministrit të Mjedisit sqaroi se në një takim që Bushati ka bërë me stafin e konsullatës në Milano, ka akuzuar konsullen e parë të emëruar prej tij se ka dhënë katër herë certifikata martese për një prostitutë.
Si njohës i historisë, duket se Nard Koka nuk ka qenë dakord me këtë
etiketim që ministri i ka bërë ishkonsulles. Madje, ai akuzon ministrin
Bushati se i ka kërkuar para konsulles Luljeta Çobanaj nga shërbimet
që ai siguronte në konsullatën tonë në Milano. “Shumë shpejt do të
dalë e vërteta për Luljetën, së cilës i kërkonte para” tha ai.
