TIRANË- Në kulmin e debatit për kërcënimin e një kandidati për Rektor të UT dhe ku i dyshuar është një person me precedentë si Emiljano Shullazi është shfaqur Kryeministri Edi Rama. Ai nuk i ka dhënë një përgjigje të drejpërdrejtë interesimit të medias për këtë ngjarje, por ka theksuar se zgjedhjet po zhvillohen normalisht. Po sipas tij, nuk ka asnjë kandidat në këtë garë, duke harruar se Klodeta Dibra është anëtare e Këshillit Bashkiak e zgjedhur nën siglën e PS-së në qershor 2015.
Më poshtë fjala e Ramës në inaugurimit e rrugës pranë Korpusit
Këto zgjedhje janë të parat në kuadrin e ri të reformës. Rregullorja e zgjedhjeve që është detyrë e qeverisë përmes MAS është hartuar në konsultim me të gjithë si asnjëherë më parë, është produkt i një marrëdhënie të re mes MAS dhe botës autonome universitare.
Si asnjëherë më parë në proces, deri tre ditë më parë, ankimimet kanë qenë zero. Dhe procesi sipas informacioneve ka ecur normalisht. Si asnjëherë më parë qeveria dhe partia më e madhe e koalicionit nuk ka ndërhyrë në asnjë moment dhe nuk kanë venë gishtin për të orientuar votën mbi një kandidat dhe jo një tjetër. Dua ta konfirmoj këtë.
Nuk ka kandidat të PS. Janë kandidatë të Universitetit, Fakultetit, që përfaqësojnë një karrierë, meritën e tyre. Të gjithë janë të barabartë. U takon atyre që zgjedhin të bëjnë zgjedhjen e tyre duke pasur parasysh që nuk po zgjedhin një parti, deputet, kryetar bashkie, por personin dhe personat që do të çojnë përpara reformën dhe do ta zbatojnë në praktikë.
