Myftiu i Shkodrës, imam Muhamed Sytari i bërë thirrje diplomacisë shqiptare që të punojë për të rikthyer në atdhe fëmijët shqiptarë që ndodhen në kampet e Sirisë.
Ai thekson se prindërit e këtyre fëmijëve janë gënjyer nga propaganda false dhe u iu bashkuan luftës në Siri, por tani pasojat po i vuajnë fëmijët që morën me vete.
“Diplomacia dhe shteti të punojnë për rikthimin e tyre në Shqipëri pasi janë të pafajshëm. Prindërit u gënjyen nga propaganda false në Siri dhe tashmë fëmijët shqiptarë po vuajnë. Shumica prej tyre kanë humbur edhe prindërit”, shprehet imami.
Reagimi i tij vjen, pasi emisioni investigativ “Le Iene” në “Italia 1” i kushtoi një reportazh shqiptarit Afrim Berisha që arriti të gjeje pas 5 vjetësh djalin e tij të zhdukur në Siri.
Në moshën 6-vjeçare, Alvi mbërriti në Siri, pasi nëna e tij e la bashkëshortin dhe dy fëmijë të tjerë të saj në Itali, ku jetonin si emigrantë dhe iu bashkua grupit terrorist të Shtetit Islamik.
Gazetari italian Luigi Pelza thotë se për të kthyer Alvin pranë familjes duhej prezenca e autoriteteve shqiptare, por një gjë e tillë është hedhur poshtë nga kryeministri Rama. Sipas kreut të qeverisë shqiptare çështja është e komplikuar dhe nuk varet nga ambasada jonë në Turqi.
Rama thotë se për kthimin e grave dhe fëmijëve nga kampet e Sirisë është hartuar një plan konkret. Është ende i paqartë numri i saktë i shqiptarëve që mbahen në kampet e Sirisë, por autoritetet shqiptare kanë vendosur kontakte me partnerët amerikanë dhe qeverinë turke për identifikimin e tyre. Situata e fundit në Siri për shkak të përplasjes me Turqisë dhe kurdëve ka vështirësuar situatën. /Opinion.al
