Besnik Mustafaj deklaroi se kalimi i dosjes 184 nga Prokuroria e Krimeve të Rënda në Prokurorinë e Dibrës është një “pagesë” që kryeprokurorja Arta Marku po bën për qeverinë që të rikonfirmohet në pozicionin e saj.
Në një intervistë televizive ish-ministri i Jashtëm Mustafaj, u shpreh se dërgimi i çështjes në një prokurori periferike tregon “kapitullimin” e Prokurorisë së Krimeve të Rënda përpara presionit qeveritar sipas tij.
“Fakti është që përgjimet janë bërë nga krimet e rënda. Që në origjinë është perceptuar si një krim që duhet të ndiqet dhe të dërgohet para drejtësisë nga Krimet e Rënda. Fakti që dosja kalohet tek Prokuroria e Dibrës, një prokurori që nuk ka kapacitete edhe sikur të ketë vendosmërinë morale për ta hetuar një dosje të tillë, nuk ka kapacitete për të hetuar një numër të madh ministra dhe ish-ministrash, përfshirë edhe kryeministrin. Dërgimi në periferi i proceseve hetimore i kësaj dosje tregon kapitullim të Prokurorisë të Krimeve të Rënda përpara presionit qeveritar. Është shumë shqetësuese për drejtësinë vetë. Kjo tregon një implikim të drejtpërdrejtë të Prokurores së Përgjithshme të përkohshme, Arta Marku. Tregon si të thuash një “pagesë” që po bën paraprakisht për të rifituar vendin e saj si Prokurore e Përgjithshme. Pra është e pashpresë nëse këtë prokurori do ta drejtojë Arta Marku”, tha Mustafaj.
Ai nënvizoi gjithashtu se në Shkodër kryeministri ka bashkëpunuar me krimin dhe ka organizuar zgjedhje të paligjshme duke promovuar figura me të shkuar kriminale. Sa i përket Partisë Demokratike, Mustafaj u shpreh se strategjia e protestave nuk do të ndryshojë por shtoi se ato duhet të jenë më të fuqishme dhe nuk duhet të duken më si festë.
“PD nuk e njeh 30 qershorin si datë zgjedhjesh. Rama vazhdon që të bëjë zgjedhje të paligjshme. Jo vetëm kaq, por ai vazhdon të promovojë figura që janë të kriminalizuara. Mazhoranca nuk do dialog me opozitën.
E vetmja gjë që nuk ndryshon është protesta. Opozita proteston, sepse nuk ka formë tjetër për të treguar se kjo qeveri ka humbur çdo lloj legjitimiteti. Për mua opozita duhet të çlirohet nga kompleksi i paqësores. Njerëzit janë të zemëruar. Ne shohim përditë protesta të fuqishme kudo në botë dhe këtu mund të jenë të njëjta protestat, të fuqishme, sepse e tillë është situata. Mendoj se protestat s’mund të jenë më si festë”, deklaroi Besnik Mustafaj. /Opinion.al
