Kreu i LDK-së, Isa Mustafa duket se i ka dhënë edhe një shans të fundit kryeministrit Albin Kurti për ruajtjen e koalcionit qeverisës në mënyrë që qeveria në Kosovë të mos bjerë.
Në një reagim në Facebook, Mustafa ka bërë publike një letër të datës 16 Mars drejtuar kryeministrit Kurti ku i kërkon heqjen e plotë të tarifës ndaj Serbisë pasi kjo po minon marrëdhëniet me SHBA-të. Në letër shkruhet se nëse kjo nuk do të ndodhë atëherë LDK do të detyrohet të largohet nga koalicioni pasi “sepse nuk duam të jemi bashkëpërgjegjës të prishjes së marrëdhënieve me aleatin tonë kryesor”.
Ai shkruan më tej se kësaj kërkese Albin Kurti ju përgjigj dy ditë më vonë duke shkarkuar ministrin e Punëve të Brendshme dhe njëkohësisht nënkryetarin e parë të LDK-së, Agim Veliu.
“Pyes, juve qytetarë të nderuar, edhe disa nga juve perfaqësues të korit diplomatik, por edhe dy tre deputetë të LDK-së: A është ky veprim i drejtë i Kryeministrit tonë? A flet ky veprim se Kryeministri Kurti është i përkushtuar ta ruaj koalicionin dhe ta luftojmë bashkërisht Virusin Corona? Ju pyes, çfarë vendimi tjetër do të duhej të merrte LDK, kur kaq keq injorohet dhe poshtrohet nga Kryeministri i vendit?”, shkruan Mustafa.
Ai e mbyll reagimin e tij duke i kërkuar popullit të Kosovës të mirëkuptojë vendimin e partisë së tij por i bën edhe një ftesë të fundit kryeministrit Kurit “ta heq tarifën, ta anulojë vendimin për shkarkimin e z. Veliu…dhe LDK-së ti kërkoj falje për veprimet e tij”./Opinion.al
