Myslim Murrizi, deputeti demokrat i cili nuk pranoi të linte mandatin, ka thënë se shumë shpejt PD do të krijojë grupin e ri parlamentar. Me marrjen e mandatit nga Arben Elezi, do të shkojë në shtatë numri i deputetëve të Partisë Demokratike në Parlament.
“Grupi parlamentar do të krijohet shumë shpejt, ndoshta të enjten bëhemi shtatë nga PD sepse do të vijë edhe kryetari Partisë Demokratike i Peqinit si deputet”, ka thënë ai për Top Channel.
Murrizi ka thënë se do të punojë për ndryshimin e Kodit Zgjedhor, pasi listat e mbyllura kanë vrarë demokracinë dhe kanë nxitur servilizmin.
“Unë si Myslym Murrizi nuk e di sa do të më ecë fjala me përfaqësues të tjerë në Kuvend, do ta kushtëzoj votën time në ndryshim të sistemit zgjedhor pasi kodi është artificë, ku të gjitha palët kanë dashur të fusin duart tek votat. Komisionerët nuk duhet të jenë politikë dhe ka administratë siç janë arsimi, pra mësues. Duhet të ashpërsohet Kodi Penal për shitblerjen e votës, si për shitësin dhe blerësin. Listat e mbyllura kanë shtuar servilizmin, kanë nxitur orekset e kërmijve politik për të monopolizuar karriget në atë Parlament”, është shprehur Murrizi./Opinion.al
